九龍城是舊區，區內每間老字號有故事又有好西，絕對獨一無二。
今次莫嘉帶你走訪九龍城區，喺試盡老店招牌菜嘅同時，發掘老店背後故事，老闆伙記還親自向我推介鎮店之寶！咁就一於動身去尋訪老香港的好滋味！Let’s Go！
單賣過千：清真牛肉館 多汁味濃牛肉餅
紮根九龍城六十多年的清真餐廳【清真牛肉館】，一直擁有食客們的高度評價，是日假期莫嘉走入餐廳，下午茶時段人頭湧湧，可見係幾咁受歡迎！
創辦人馬老先生是一名虔誠的回教徒，先後在廣西和上海開過餐廳，後來南下香港，喺紅磡由排檔做起，越做越受歡迎。問問侍應啊姨有咩招牌好推介，侍應啊姨豪言「樣樣都係招牌菜！」旁邊收銀姐搭嘴：「牛肉餅、咖哩、酸辣湯、餃子都好好賣～」（望一望menu，心諗你差唔多讀哂所有食物種類出黎）
上菜！咖喱牛腩湯麵味道好特別，牛腩煮得好入味，清真咖喱味道同平時食開嘅有分別（廢話），第一次試食覺得還可以，無伏無伏！
清真牛肉餅身邊好多朋友食過都讚不絕口，我細細個就聽過佢個名架喇～ 賣相唔差，漲卜卜大大個，一咬已經已爆出肉汁，大大啖咬好滋味！食一個已經飽左一半～
問店員招牌菜牛肉餅一日賣幾多個，收銀姐姐笑笑口話得老闆有統計，後尾一問廚房大佬，原來呢個「清真牛肉餅」假期最好賣，每日可以賣過千，成日做到無停手！
【清真牛肉館】清真牛肉餅 $36/兩件、咖喱牛腩湯麵 $53
地址：九龍城龍崗道1號
‘
年復年的心血累積：潮式糖水舖【合成糖水】
行出清真牛肉館，幾個鋪位外就係另一間地區老店【合成糖水】。
合成糖水最出名就係潮州式糖水，滿足到甜品胃之餘又有養生功效。一碗招牌潮式糖水「潮州綠豆邊薏米馬蹄沙」，實而不華的米白豆蓉賣相，下肚卻是滿滿的人情味—— 足料而味厚，馬蹄的清爽口感、煮得細綿的綠豆和薏米、恰到好處的甜度，一碗清甜的糖水足以驅走盛夏的暑氣。
小舖前身係深水埗大排檔，後來回歸時遷舖至九龍城現址至今。老闆方生話，原本大排檔時期只有幾款糖水，後來重新開店後同弟弟一家一齊研究製作方法，先至有而家嘅七十幾八十款糖水。
小店最威水就係衝出香港，日本傳媒特意來港採訪，方生記得日本人最欣賞嘅就係「黑糯米」，幫甜品影埋close up做專題介紹！除左外國人，本地客都十分捧場。糖水舖營業至凌晨一點，方生話夜晚最旺，要開埋第二層。店内售賣潮式同本地港式甜品，方生話潮式如綠豆邊、薑茨百合等較受歡迎，尤其係年輕客人，貪佢有養生功效咁話！
【合成糖水】潮州綠豆邊薏米馬蹄沙 $39
地址：九龍城龍崗道9號
‘
港人的泰菜堅持：金蘭花
「喺九龍城，唔做泰菜係站唔住腳。」金蘭花負責人劉生如是說。
老闆話，自己本身中意食泰菜，所以都有要求。廚房揸fit大廚係泰國人，煮左至少十五年，老師傅手勢好係一大保證咁話。老闆中意食泰菜但唔識煮，佢開員工派對時食到咩好食菜式，就會將佢記低，甚至將其加入正式菜單中。
九龍城又有「小泰國」之稱，幾乎每一條街都有幾間泰國菜館，想突圍而出一D都唔容易。金蘭花泰菜單品性價比高，好似泰式串燒一串$13，大大碟泰式燒豬頸肉$76，重點係無加一又夠分量，所以開業廿幾年來口碑載道。
老闆喺九龍城做泰菜多年，話人流與恆指掛鈎，股市好就人多！「嗰時好多明星拍完戲會過黎食野（編按：連周星馳都係座上客），老一輩識黎呢邊搵食，後生一輩少到九龍城，可能係因為附近無咩行無咩玩……」
想當年學校喺九龍塘，但竟然無咩落過九龍城搵食，回想起真係走寶……
【金蘭花】泰式串燒 $13/串、泰式燒豬頸肉 $76
地址：九龍城龍崗道10-12號
‘
舊香港的味道：豪華蛋撻及公和豆腐花
除了主餐，九龍城仲有夠晒地道嘅港式風味小食。就好似蛋撻同豆腐花，一件名物撐起小舖，行過隨時可見街頭立食奇景！
豪華蛋撻賣相樸實，一點也不豪華，但就深得街坊愛戴，一出爐就賣清光！發哥同蔡瀾都係豪華捧場客，隨時有可能野生捕獲發哥（然而這些機會不是我的……） 酥皮蛋撻夠出名，但莫嘉更愛「少甜葡撻」，伙計話好多菲傭都會黎幫襯～ 近年老闆周師傅仲開班授徒，想學整餅嘅可以考慮一下。
【豪華餅店】酥皮蛋撻、少甜葡撻 各$8
地址：九龍城衙前圍道136號
公和荳品廠係百年老店，賣足咁多年生意一樣火紅，招牌豆腐花名不虛傳，一吃滿口豆香，連黃糖都唔使加都係第一次！公和而家仲有賣其他小吃例如煎釀三寶、煎豆腐等，一樣價廉物美。近年因為食環署執法，指豆品店只持有食物製造廠牌照，所以小店只提供立食同外賣，但一樣無損食客興致，唔少人專程揸車黎食！
【公和荳品廠】招牌豆腐花 $13、煎豆腐 $10
地址：九龍城福佬村道67號
–
🔸🔹🔸🔹🔸🔹🔸🔹🔸🔹🔸
😆 Facebook page或Instagram還有更多旅遊分享：
Instagram: @monka.ng
🔸🔹🔸🔹🔸🔹🔸🔹🔸🔹🔸
Wanderlust Monka 