啊媽教落「呻窮莫呻飽」，喺「通漲猛於虎」嘅今時今日，手頭上又無乜錢都好難食得好啊～

今次莫嘉就帶大家去港島灣仔區，介紹幾間心水食店比大家！要食平啲啲之餘又可以食好啲啲，其實唔難嘅！

【早餐：快樂餅店】

想食包食得飽，就要嚟呢間開業三十幾年嘅快樂餅店喇！

老闆曾經講過「佢（造包）堅持用豬油，不加人造色素」，我即刻買個新鮮熱辣嘅雞尾包支持吓老闆先。咬落發現竟然係實心，令食慣化學空心包嘅我十分感動！嗚嗚嗚～

• 雞尾包 / 墨西哥包 $4
  （剩餘：$ 96）

地址：灣仔皇后大道東106號

【正餐：明明車仔麵專門店】

到左午餐時間喇，要食啲粉麵暖暖肚！我就揀左一間中價嘅車仔麵，佢總共有八款麵、四款醬同三十幾款餸任君選揀，三餸一麵都只係 $35咋！

今次試左瑞士雞翼、五香牛腩同墨丸配沙嗲湯麵。麵既粉量唔算多，餸份量就好足，有兩隻雞翼、三塊牛腩同兩粒墨丸，前兩款不過不失，墨丸咬落唔彈牙，有少少失望。

（剩餘：$ 61）
地址：灣仔軒尼詩道290號地下

【下午茶：豪華咖啡茶廳】

呢間睇起嚟毫不豪華嘅舊港式茶餐廳係五十多年老鋪，每日供應即叫即制嘅三文治、多士同粉麵，最好嘅係平得黎都有好味道，好唔 match百物騰貴嘅港島區！

「蛋牛治」$14
又香又脆嘅烘方包夾住炒蛋同牛肉，鹹牛肉質感好似午餐肉，份量十足，食落口啖啖肉，好滿足！

「沙嗲牛肉包」 $19
另外沙嗲牛肉包，食落都唔錯㗎，沙嗲牛肉通常跟麵食，估唔到夾包都一樣好味！沙嗲牛味濃又唔會太老，加埋烘到脆卜卜嘅熱狗包，食完都飽左一半。

（剩餘：$47）

地址： 灣仔莊士敦道226號

【平食晚餐：標記雲吞麵】

莫嘉住新界區，一出港島正宗大鄉里出城——講個銀包呀！手頭得返 $47 可以點樣解決晚餐呢？行行下發現一間標榜全日特價既粉麵店，即刻入去試下先！

嘩！呢間麵店既雲吞麵、牛腩麵等全日都係賣 $19 蚊！呢個價係港島黎講絕對平！又係用 $30 就可以有一碗麵加油菜或野飲：

「柱侯牛腩河 加 油菜」$19 + $9 = $28
牛腩汁正正常常，牛腩份量有D少，但河粉夠多，食到好滯；成日無乜食過菜，加碟菜 $9，中等份量，菜心幾甜。咁既價位，收貨啦！

另一選擇：「雲吞魚蛋米雙拼（14:30後送豆漿）」$27
呢間鋪頭既麵睇落細細碗，但其實份量比想像中多，雲吞同魚蛋中等水準，只可以說 $27雙拼仲有豆漿，以地段、價錢黎講算係超值。莫嘉有另一心水雲吞麵店交加街「權記雲吞」，呢間雲吞大大粒仲好食，可惜星期日唔營業（哭）

（剩餘：$19）

地址：灣仔灣仔道119號

【甜品：翠苑甜品專家】

晚飯都食完喇，淨返唔夠 $20蚊，可以食咩呢？緊係要餵飽「甜品胃」啦！翠苑甜品專家位於灣仔道一條斜巷一角，本鋪位於銅鑼灣，以有養生功效的中式糖水聞名。

是日到訪，店員姨姨大力推薦週末限定「腰果糊」，當然要試試！

「首創健脾補腎腰果糊」 $17
個名好長，唔知道係咪真係有健脾補腎作用，純粹因為店員推介同見好多人嗌所以跟機嗌碗試下。味道不俗，好有果仁味，食得出用左好足料，但可能因為太「傑」身，食半碗有飽滯感覺，最後食唔哂成碗。

「大良燉鮮奶」 $20

星期一至五光顧或想食較大眾化甜品的話，我會推薦大良燉鮮奶。燉奶都幾滑，好重奶味， 食完飯想食甜野中和返就岩岩好。

（剩餘：$2）

食足全日都重有兩蚊淨嘅感覺真係好！

–

* 原文載於：「紅頁指南」《是日挑戰：一百大洋食盡灣仔，食足五餐！》

紅頁指南 Facebook Page – https://www.facebook.com/RedPages.hk/

–

🔸🔹🔸🔹🔸🔹🔸🔹🔸🔹🔸

😆 Facebook page或Instagram還有更多旅遊分享：

Instagram: @monka.ng

Facebook Page: Monka 莫嘉的漫遊地圖

🔸🔹🔸🔹🔸🔹🔸🔹🔸🔹🔸